ລົດໄຟຟ້າມີຈັກປະເພດໃຫ້ເລືອກ

ປັດຈຸບັນລົດຍົນໄຟຟ້າມີ 6 ປະເພດ ທີ່ອອກແບບມາໃຫ້ຕອບໂຈດການໃຊ້ງານທີ່ແຕກຕ່າງກັນ ຕໍ່ໄປນີ້

1. ລົດຍົນພະລັງງານໄຟຟ້າ (EV)

  ເປັນລົດຍົນທີ່ຂັບເຄື່ອນດ້ວຍການໃຊ້ພະລັງງານຈາກແບັດເຕີຣີພຽງຢ່າງດຽວ ຈະບໍ່ມີຂະບວນການເຜົາໄໝ້ຂອງເຄື່ອງຈັກພາຍໃນ ໃຊ້ເວລາສາກໄຟບໍ່ດົນກໍ່ສາມາດໃຊ້ງານໄດ້ແລ້ວ.

2. ລົດຍົນໄຟຟ້າແບບອີ-ພາວເວີ(E-Power)

 ເປັນລົດຍົນທີ່ພັດທະນາຂື້ນໂດຍນຳເອົາການທຳງານຂອງເຄື່ອງຈັກໃນລະບົບ Hybrid ກັບລະບົບ EV ມາປະສົມປະສານເຂົ້າກັນ ຈະມີເຄື່ອງຍົນຂະໜາດນ້ອຍທີ່ເຮັດໜ້າທີ່ປັ່ນກະແສໄຟຟ້າໄປເກັບສະສົມໄວ້ທີ່ແບັດເຕີຣີ ຫຼັງຈາກນັ້ນສົ່ງພະລັງງານໄປຍັງມໍເຕີ ຕົວລົດຍົນຈະສາມາດຂັບເຄື່ອນໄດ້ດ້ວຍພະລັງງານໄຟຟ້າທີ່ຖືກສ້າງມາຈາກຕົວເຄື່ອງຈັກນັ້ນເອງ ລົດຍົນໄຟຟ້າແບບອີ-ພາວເວີມີການເຕີມນ້ຳມັນ ແຕ່ບໍ່ມີການສາກໄຟ.

3. ລົດຍົນໄຟຟ້າແບບໄຮບິດ (HEV)

  ຂຶ້ນຊື່ວ່າໄຮບິດ ກໍຕ້ອງມີການທຳງານແບບປະສົມປະສານກັນ ແຕ່ຍັງຄົງ Concept ປະຫຍັດພະລັງງານ ແຕ່ເປັນລະບົບການທຳງານທີ່ໃຊ້ພະລັງງານຈາກນ້ຳມັນເຊື້ອໄຟປະສົມກັບພະລັງງານໄຟຟ້າ.

4. ລົດຍົນໄຟຟ້າປັ່ກ-ອີນໄຮບິດ (PHEV)

 ລົດຍົນໄຟຟ້າແບບໄຮບິດທີ່ປະສົມປະສານລະຫວ່າງເຄື່ອງຍົນກາຊວນ ຫຼື ແອັດຊັງ ເຮັດວຽກຮ່ວມກັບ ແບັດເຕີຣີຂະໜາດໃຫຍ່ທີ່ສາກພະລັງງານໄຟຟ້າໄດ້ ສາມາດໃຊ້ໄດ້ທັ້ງພະລັງງານຈາກໄຟຟ້າ ແລະ ນໍ້າມັນ.

5. ລົດພະລັງງານໄຣໂດຣເຈນ (Fuel Cell)

 ລົດຍົນທີ່ມີການນຳເອົາພະລັງງານໄຣໂດຣເຈນມາດັດແປງມາເປັນກະແສໄຟຟ້າເພື່ອໃຊ້ໃນການຂັບເຄື່ອນລົດຍົນ ຂະບວນການທຳງານທີ່ສົ່ງໄຣໂດຣເຈນ ແລະ ອອກຊີເຈນເຂົ້າໄປທີ່ແຜງນໍ້າມັນເຊື້ອໄຟ ແລະ ສ້າງກະແສໄຟຟ້າເກັບໄວ້ໃນແບັດເຕີຣີຈາກນັ້ນກະແສໄຟຟ້າຈະສົ່ງໄປທີ່ ມໍເຕີໄຟຟ້າທີ່ເປັນແຫຼ່ງຈ່າຍໄຟຟ້າໃນການຂັບເຄື່ອນລົດຍົນ.

6. ລົດຍົນໄຟຟ້າແບບໃຊ້ແຫລ່ງພະລັງງານ (Plug-in Electric Vehicle:PEVS)

 ລົດຍົນທີ່ມີແບັດເຕີຣີເປັນແຫຼ່ງພະລັງງານຫຼັກຢ່າງດຽວ ແລະ ໃຊ້ວິທີ່ການສາກແບັດເພື່ອສາກໄຟໃຫ້ກັບມາໃຊ້ໃໝ່ອີກຄັ້ງ, ແບ່ງອອກເປັນ 2 ປະເພດຄື: ປະເພດລົດໄຟຟ້າແບັດເຕີຣີ້ (BEV) ໃຊ້ພະລັງງານຈາກແບັດເຕີຣີ 100% ແລະ ປະເພດລົດຍົນໄຟຟ້າ Fuel Cell (FCEV) ທີ່ໃຊ້ນ້ຳມັນເຊື້ອເພິງໄຮໂດຣເຈນ.